Turkman qovuni kuni har yili avgust oyining ikkinchi yakshanbasida Ashxobodda o‘tkaziladi. Bu yil ushbu sana 10-avgustga to‘g‘ri keladi.

Turkmanlar uchun bu milliy bayram, biroq mamlakatning qovun yetishtiruvchilari uni o’zgacha quvonch bilan nishonlaydi. Bu bejiz emas: dunyodagi qovun hosilining to‘rtdan bir qismi Turkmanistonda yetishtiriladi. Aniqroq aytganda: hozirgi kunda dunyo bo‘yicha 1 600 dan ortiq qovun navi ma’lum bo‘lib, ularning 400 dan ziyodi aynan turkman seleksionerlari tomonidan yaratilgan.

Qovun poliz malikasi deb e’tirof etilishining yana bir sababi bor: qadimiy Gyaur-qala qishlog‘i qazilmalarida bir nechta qovun urug‘i topilgan. Bu mazali, shirin va xushbo‘y qovunlar Turkmaniston yerlarida bir necha ming yillardan beri yetishtirib kelinayotganini anglatadi.

Mahalliy qovun yetishtiruvchilar ajdodlar an’analarini davom ettirgan holda qovunni o‘zining ulug‘ merosi va milliy boyligi sifatida qadrlaydi. Ular uchun qovun — mahorat timsoli va mehnatsevarlik ramzi.

10-avgust kuni, Gawun baýramy munosabati bilan Turkmaniston poytaxtida va boshqa shaharlarda ommaviy bayram tadbirlari, konsertlar va qovun mahsulotlari ko‘rgazmalari bo‘lib o‘tadi. Mehmonlarga turli qovun navlari va ulardan tayyorlangan ishtahaochar milliy taomlar taklif etiladi.

Eng yaxshi qovun yetishtiruvchilar va hosil yig‘uvchilar esa “Oltin asrning Oltin polizi” deb nomlangan tanlov g‘olibi sifatida Turkmaniston prezidenti tomonidan mukofotlanadi.