Bir oy davomida Qoraqalpogʻiston poytaxti Fransiyaning san’ati, musiqasi va dizayni bilan yaqindan tanishadi.
Madaniy muloqot Fransiyaning Oʻzbekistondagi elchixonasi hamda mintaqaning yetakchi madaniyat markazlari — Savitskiy nomidagi muzey, konservatoriya, Berdaq nomidagi teatr, san’at instituti va bir qator ta’lim muassasalari hamkorligida tashkil etilgan keng koʻlamli dastur tufayli amalga oshdi.
Dasturda — kino-namoyishlar, konsertlar, ko‘rgazmalar, rassomlar bilan uchrashuvlar va ijodiy mahorat darslari o‘rin olgan: bu tadbirlarda san’at suhbatga, ilhom manbaiga aylanadi.
“O‘zbek fotografi nigohidagi Fransiya”
Dastur doirasidagi voqealardan biri — Jolliboy Izentaev nomidagi ixtisoslashtirilgan san’at maktab-internatida 30-noyabrgacha davom etadigan yosh fotograf Bobur Olimxo‘jayevning ko‘rgazmasi bo‘ldi. Yosh fotograf Fransiyaga ijodiy safarda bo‘lib, u yerdan mamlakatning kundalik hayotini aks ettirgan suratlar turkumi bilan qaytdi: uning ob’yektivida Fransiya poytaxtining jo‘shqin hayotidan tortib, provinsiyalarning sokin ritmigacha bo‘lgan manzaralar o‘z aksini topgan.
Surat: Bobur Olimxo‘jayev
Surat: Bobur Olimxo‘jayev
Surat: Bobur Olimxo‘jayev
Surat: Bobur Olimxo‘jayev
5-noyabr kuni bo‘lib o‘tgan ko‘rgazmaning ochilishida Fransiyaning O‘zbekistondagi elchisi Valid Fuk, Qoraqalpog‘iston Respublikasi vakillari, o‘qituvchilar va o‘quvchilar ishtirok etdi. Tadbir muhitida hayratlanarli darajada samimiylik va jonlilik sezildi. Bobur Olimxo‘jayev shunday deydi: «Bu muhim va ramziy lahza edi — madaniyatlar, qarashlar va avlodlar o‘rtasidagi nozik ko‘prik».
Ilhom uchquni tug‘iladigan uchrashuv
Rasmiy ochilishdan so‘ng fotograf san’at orqali dunyoning go‘zalligini ko‘ra olishni o‘rganayotgan maktab o‘quvchilari bilan ijodiy uchrashuv o‘tkazdi.
Surat: Bobur Olimxo‘jayev
Bunday uchrashuvlarning eng katta qadriyati — orzu qilishga bo‘lgan ishonch va jur’atdir:
«Agar bu suhbatdan keyin hech bo‘lmaganda bitta inson yo‘lida davom etish, sinab ko‘rish, izlanish va yaratishga ilhom olgan bo‘lsa, demak, bu uchrashuv bekorga o‘tkazilmadi».
Ilhom — madaniy almashinuv yo‘nalishi sifatida
Bu ko‘rgazma — shunchaki suratlar turkumi emas. Bu muloqotga, dunyoga va bir-birimizga diqqat bilan boqishga taklifdir.
Bobur aytganidek:
«Madaniyat — bu faqat ko‘rgazmalar va sanalar emas. Bu — muloqot. Ishtirok. Iliqlik».
Aynan mana shunday iliqlik Nukusda o‘tayotgan Fransuz madaniyati Birinchi oyi dasturining yuragiga aylanadi — u Fransiya, O‘zbekiston va Qoraqalpog‘iston o‘rtasida yangi ijodiy aloqalarga yo‘l ochuvchi tadbirdir.
