Issiqko‘l — dunyodagi ikkinchi eng yirik sho‘r suvli hamda eng chuqur suv havzalaridan biri hisoblanadi (eng chuqur joyi 670 metr). Uning nomi qirg‘iz tilidan “iliq ko‘l” deb tarjima qilinadi. Darhaqiqat, uning suvi yumshoq va yoqimli, shuningdek, tarkibidagi tuz tufayli hatto yanvarda ham muzlamaydi.
Oltinrang qumli plyajlarda hamma uchun joy yetarli – hatto eng gavjum mavsumda ham. Mehmonxonalar va turar joylar xilma-xilligi esa har bir sayyohga o‘z talablariga mos variantni tanlash imkonini beradi.
Har yili bir milliondan ortiq sayyoh Qirg‘izistonga Issiqko‘l va tog‘ kurortlarida sog‘lomlashtiruvchi dam olish uchun tashrif buyuradi. Suvning mineral tarkibi davolovchi xususiyatlarga ega, shu sababli bu ko‘l haqli ravishda shifobaxsh deb e’tirof etiladi.
Nimalar bilan shug‘ullanish mumkin
Issiqko‘l nafaqat quyoshda soyabon ostida kokteyl yoki qimiz ichib dam olish, balki faol hordiq uchun ham juda mos.
Kayakda qirg‘oq bo‘ylab, Cho‘lpon-Ota tomonga suzish yoki SUP-doskalarda uchish mumkin. Ko’lda hammadan uzoqroqqa bora olgan, ya’ni suzgan odam — bu kanadalik Xyugo Dezroze: u kayakda yakka o‘zi butun Issiqko‘lni aylanib chiqqan — 400 km dan ortiq masofani 17 kunda bosib o‘tgan. Uni tushunish mumkin. Shuningdek, qayiqni ijaraga olib, ko‘l bo‘ylab sayohat uyushtirish, suzish, sho‘ng‘ish yoki paraseyling bilan shug‘ullanish ham mumkin.
Quruqlikda esa Skazka, Konorchek, Jeti-Og‘uz va Barskun kanyonlariga piyoda sayrlar yoki jiplarda yurishlar tashkil etiladi. Bunday sayrlar sharsharalarga yoki tomosha maydonchalariga ko’tarilishni ham nazarda tutadi. Madaniyatga qiziqqanlar uchun Qorako’l vodiysi va qirg‘oq bo‘ylab otda sayr qilish tavsiya etiladi. Shu bilan birga mahalliy yo‘l boshlovchilar sizni ko‘chmanchi turmush tarzi bilan tanishtiradi. Ko‘proq taassurot olishni istasangiz, 2–5 kunlik turlarni tanlang, ular chodirli o‘tovlarda tunash, issiq buloqlarga safar qilish, Cho‘lpon-Otadagi Ruh Ordo madaniy markaziga tashrif buyurish va Qorako’l bo‘ylab ekskursiyalarni o‘z ichiga oladi.
Bundan tashqari, bu paraplanerizm bilan shug’ullanish uchun eng yaxshi joylardan biri. Qirg‘iziston hududining 94 foizini Tyan-Shan va Pomir tog‘lari egallagan, demak, bu yerdan ochiladigan manzaralar haqiqiy mo‘jiza.
Gastronomiya
Issiqko‘lda albatta quyidagilarni tatib ko‘rish kerak: lag‘mon, manti, palov, tandir somsa va yangi tutilgan ko‘l baliqlari. Ko‘pchilik sayyohlar bu taomlarga to‘g‘ridan-to‘g‘ri qirg‘oqdagi “U Rybaka” kafesida buyurtma berishni tavsiya etadi.
Qorako‘lda joylashgan “Dastorkon” restoranida tayyorlanadigan beshbarmoq esa alohida e’tiborga loyiq — bu yerda taomga qazi mo‘lgina solinadi.
“Café Zarina”da esa nafaqat an’anaviy, balki vegetarian taomlarni tatib ko‘rish hamda chakandadan tayyorlangan xushbo’y choydan rohatlanish mumkin. “Lighthouse Coffee” va “Altyn Kumara” esa uncha qimmat bo’lmagan, biroq taomlari mazali va yaxshi servisni taklif qiluvchi qahvaxonalarni izlayotganlar uchun ayni muddao. Deyarli barcha joylarda ko‘l manzarasiga qaraydigan terrasalar, ingliz va rus tillaridagi menyu hamda mehmondo‘stlik ruhi mavjud — bu yerda gastronomiya, boshqa jihatlari kabi, a’lo darajada.
Layfxaklar
– Cho‘lpon-Ota pirslaridan har soatda ekskursiya katerlari yuradi – bu yerda o‘zingizni qiziqtirgan ko’l sayohatini yoki ko’ngilochar mashg’ulotni tanlash oson.
– Ekskursiyalarni plyajda yoki Instagram orqali qidiring – mahalliy gidlar o‘z turlarini u yerda faollik bilan targ‘ib qiladi va Direct’da tez javob berishadi.
– Qulay va xavfsiz sayohatlar uchun Yandex Taxi ilovasini yuklab oling.
– Tog‘li hududlarda internet bo‘lmasligi mumkin, shuning uchun oldindan 2GIS kabi offline xarita ilovasini yuklab qo‘ying.
