Moel Bosh brendining “Ipak va paxtaning beshigi” deb nomlangan yangi to‘plamida Sharq va Yevropa ohangi bir-biriga hamohang yangraydi. Bu yerda o‘zbek matolari yevropa shakllari bilan uyg‘unlashib, har bir tafsilot hunarga va ildizlarga bo‘lgan muhabbat ifodasiga aylangan moda muloqotini yaratadi.
To‘plam nomi beshik – o‘zbek xalqining beshigiga, ya’ni boshlanish va davomiylik ramziga ishora qiladi. Bu obraz metaforaga aylanadi: mato, kashta, materialning harakati – bularning barchasi tarixni to‘qiyotgan avlodlar, ayollar va ustalarning qo‘llarini birlashtiradi.
Kashtalar Madina Qosimboeva maktabining ustalari tomonidan aynan Moel Bosh uchun yaratilgan. Ularning ishlarida qo‘l mehnatining nozikligi, an’ananing nafasi va zamonaviy yengillik mujassam.
To‘plam ranglar uyg‘unligi, yerning iliqligi va tonggi yorug‘likni eslatadi: qum rang, och sarg‘ish, kulrang-ko‘k, och qizg‘ish-jigarrang, mayin pushti va och binafsha tuslar. Siluetlar yumshoq, nafis, yelka chizig‘i mehr bilan yaratilgan va bel qismiga urg‘u berilgan. Ko‘ylaklar, yubkalar, jaketlar va pal’tolar havoga uyg‘un harakatlanayotgandek, matoning yengilligini saqlaydi.
“Ipak va paxtaning beshigi” – bu shunchaki to‘plam emas. Bu — merosga ehtiyotkorona munosabatning manifesti va qo‘l mehnati hanuz eng zamonaviy qadriyat ekanligining tasdig‘idir.
Moel Bosh brendi 2012 yilda Zuhra Inat tomonidan qizlari – Diyora, Dodo va Go‘zal bilan birga yaratilgan. Brend qo‘l mehnati bilan tayyorlangan dizayner liboslariga ixtisoslashgan bo‘lib, unda an’anaviy ikat naqshi zamonaviy tikuv uslubi bilan uyg‘unlashgan. Har bir mahsulot alohida muhabbat va tafsilotlarga e’tibor bilan tayyorlanadi, matolar esa bevosita Zuhra Inat tomonidan ishlab chiqiladi. Moel Bosh tabiiy materiallarni – ipak va paxtani afzal ko‘radi, o‘z matolarini yaratadi, shuning uchun brend asl, tabiiy va butunlay qo‘l mehnati bilan tayyorlangan bo‘ladi.
Ushbu to‘plam qadimiy Samarqand ornamentlaridan ilhomlangan bo‘lib, har bir kashta o‘zining ramziy ma’nosini anglatadi hamda qo‘l mehnati bilan bajariladi.
