Besh yil davomida keng jamoatchilikdan yashirin qolgan mehnat natijasida mohir ustaning shaxsiy tajribasi madaniy xotira bilan qorishgan, Markaziy Osiyoning an’anaviy shakllari esa jahon rassomchiligi ruhiga ulanib ketgan turkum asarlar ko‘rinishida yuzaga keldi.
Muqarnaslar — hayot ichidagi hayot
Loyihaning boshlang‘ich nuqtasi — muqarnaslar, ya’ni Samarqand yoki Buxoroning qadimiy masjidlarini bir bor bo‘lsa ham ziyorat qilgan va ulug‘vor gumbazlarga boqqan har bir kishiga tanish bo‘lgan stalaktit shaklidagi gumbazlar tuzilmalaridir. Ushbu geometrik cheksizlik Alim Maratovichga “yana bir hayot”ni — makon ichida paydo bo‘ladigan boshqa makonni ko‘rish imkonini berdi. Uning asarlarida murakkab arxitektura shakllari badiiy obrazlarga aylanadi, muqarnaslarning ritmlari esa tuvalda yangi hayot kasb etib, me’morchilikdan qanday qilib rangtasvir tug‘ilishining o‘ziga xos go‘zalligini eslatadi.
Madaniy muloqot
Ko‘rgazmaning ikkinchi yo‘nalishi — jahon rang-tasviri, eng avvalo Uyg‘onish davri bilan muloqotdir. Alim Maratovich oldingi mohir ustalarning asarlarini bevosita takrorlamaydi, biroq tanish kompozitsiyalar va ramzlarni o‘zining vizual tiliga uyg‘un tarzda singdiradi. Sharqona naqshlar va Uyg‘onish davri syujetlari yagona badiiy makonga aylanadi.
Erkak va ayollik, yorug’lik va soya
Turkumning markaziy mavzusi — erkak va ayol ibtidosining o‘zaro ta’siri. Bu energiyalar bir-biriga ta’sir qilib, tortishuv, uyg‘unlik va ziddiyatni yuzaga keltiradi.
Yangi bosqich
One More Life ko‘rgazmasi — nafaqat ko‘p yillik mehnatning yakuni, balki yangi bosqichning boshlanishi hamdir. Ushbu turkumda rassom o‘z ildizlarini qayta talqin qiladi, Markaziy Osiyo arxitektura motivlarini san’atning universal tili bilan uyg‘unlashtirib, an’ana va zamonaviylik, shaxsiy tajriba va umumiy madaniy ifoda o‘rtasida ko‘prik yaratadi.
“Regeneration” sanʼat galereyasidagi koʻrgazma sizni muqarnaslar yorugʻlik va ritmga aylanib, Sharq va Gʻarb naqshlarini asarda oʻzaro uygʻunlashtirgan ajoyib dunyoga chorlaydi.
Rassom va uning yo‘li
Alim Maratovich — ko‘p qirrali biografiyaga ega rassom. U rang-tasvir, grafika, dizayn, digital-art bilan shug‘ullangan, interyerlar yaratgan va Nyu-Yorkdagi “United Nations: Nations–Water–Cultures” ko‘rgazmasidan tortib Londondagi “Watercolor + Works on Paper Fair” gacha bo‘lgan xalqaro loyihalarda ishtirok etgan. Alim Maratovichning asarlari AQSh, Buyuk Britaniya, Italiya, BAA, Germaniya, Rossiya va O‘zbekistonning xususiy kolleksiyalarini bezab turibdi.
Rassomning badiiy rivoji Toshkent bilan chambarchas bog‘liq — u bu shaharda Mehnat faxriysi Zaynutdin Faxrutdinovdan ta’lim olgan, Toshkent arxitektura-qurilish institutida o‘qigan va dizayn sohasida faoliyat yuritgan.
