Biz barchamiz xotiramizda uzoq saqlanib qoladigan manzaralarni izlaymiz. Biz joy bilan bog’lanib qoladigan ta’mlarni izlaymiz. Biz sayohatni unutilmas qiladigan tuyg’ularni izlaymiz. Men Chimbuloqda 3 200 metr balandlikka chiqqanimda, u yerda bunchalik shinam kottejlarni ko’raman deb o’ylamagandim. Ulkan panoramali derazalari orqali qorli cho’qqilar ko‘rinib turadigan Tenir tog’ kurortidagi uylarchalar – go’yo yangi turmush qurganlarga asal oyi uchun atay yaratilgandek. Yolg’izlik, go’zallik va osoyishtalik. Keyin esa xuddi Olam mening fikrlarimni o’qigandek, Instagram lentamda Markaziy Osiyoning eng go’zal manzaralari paydo bo’la boshladi – Pomir, Issiqko’l, Amirsoy.

Men turmushga chiqayotgan paytimda, asal oyi safarlari hali urfda emas edi. Ammo yigirma yil o’tib qizim to’yiga tayyorgarlik ko’rganida, asal oyi – eng muhim bandlardan biriga aylandi. Biz turmsh o’rtog’im bilan faqatgina bitta romantik safar borishga ulgurdik – Sankt-Peterburgga. Oq tunlar, ochiladigan ko’priklar – bu nihoyatda go’zal edi. Ammo keyinchalik biz beshta farzandning ota-onasiga aylandik va barcha sayohatlarimiz shovqinli, g’ala-g’ovurli, g’amxo’rlikka to’la oilaviy safarlarga aylandi. Shunga qaramay, bir kun kelib men chamadonimni yig’ib, turmush o’rtog’im bilan o’zimizning asal oyimizga – faqat ikkalamiz parvoz qilishni hanuz orzu qilaman.

Mening sayohatlarimdan

Xiva va Urganchda menda o’zimga xos bir odat bor: albatta tuxumbarak, shivit-osh va qovurilgan baliqni ta’tib ko’rish. Bu safar men nafaqat bu “bandlarning” barchasini bajardim, balki festivalda o’nlab turdagi shirin qovunlarni ham ta’tib ko‘rdim. Olmaotada ham menda o’z gastronomik ro’yxatim bor: beshbarmoq va bo‘g’irsoqlar. Men ularni birdan ikkita joyda ta’tib ko’rdim – Ayul va Jinau restoranlarida. Medeoga borayotgan paytda yo’lda men Mountain Queen Resort’ga kirib o’tdim va u yerdagi nok bilan pishirilgan o‘rdak taomidan hayratda qoldim, Manane restoranida esa xinkali’ni ta’ib ko‘rdim. Joyni ko’zdan kechirar ekanman, “Bu yerda nechta mehmon uchun to’y o’tkazish mumkin ekan?” deb o’yladim.

Olmaotada men Resident tarmog‘iga mansub yangi mehmonxona – Abay Hotel’da to‘xtadim. Mehmonxona tomida esa tantanalar uchun ajoyib joy – ochiq terrasa mavjud. Hatto o’ninchi qavatdagi xonamdan ham ajoyib manzara ko’rinar edi: bir tomonda – shahar, ikkinchi tomonda – tog‘lar. Instagram’da menga Svetlana Xaninaeva (Svetlana Khaninaeva) yozdi: “Barno, Olmaotaga kelganingizda albatta biznikiga ham tashrif buyuring!”. Abilayxon ko’chasidagi Platforma fudmarketida uning kichik go’sht restorani «Kazmyaso» (halol go’sht – o’zlarining podasidan yetkazib beriladi) joylashgan. Men o’zimni “Julie & Julia: Retsept bo’yicha baxt tayyorlaymiz” filmidagi Juliyaga o’xshab his qildim.

Shuncha mazali steyklar, tartarlar, pashtetlar va medalonlarni anchadan beri hammasini baravar ta’tib ko‘rmagan edim. Mening safarlarim nafaqat yangi taassurotlar bilan, balki ta’mlarning boyligi bilan ham to’la – sayohat qilish bu juda mazali.