Aynan shu yerda – Ipak yo‘lining yuragida – noyob nashr Travel + Leisure Central Asia dunyoga keldi. Uning maqsadi -Markaziy Osiyoning besh mamlakatini yagona, jahon darajasidagi sayohat qo‘llanmasida birlashtirishdir.
Travel + Leisure – bu sayohat, madaniyat va hayot san’atining uyg‘unligi. Bu – ongli turizm falsafasi, mayda tafsilotlarda go‘zallikni ko‘ra bilish, insonlar, madaniyat va tabiiy manzaralardan ilhom topish san’atidir.
Markaziy Osiyo nashri ushbu missiyani davom ettirib, sayohatchilarga yangi joylarni kashf etishda va tanish manzaralarga yangicha nigoh bilan qarashda yordam beradigan zamonaviy media-loyihani yaratmoqda.
Kashfiyotlar yo‘li boshlanadigan maskan
Qadimda Marko Polo Yevropadan Markaziy Osiyo orqali Xitoyga yo‘l olganidek, Travel + Leisure ham o‘sha yo‘llarga qaytmoqda – dunyoga hammasi boshlangan joy haqida yana hikoya qilish uchun.
“Bizning mintaqam o‘ziga xos joziba, sir va so‘z bilan ifodalab bo‘lmaydigan, faqat shu yerda bo‘lganingda his etiladigan sehrga ega,” – deydi bosh muharrir Barno Ikramova.
Jurnal o‘quvchi oldida faqat manzaralar va diqqatga sazovor joylarni emas, balki mintaqaning ruhini ham ochib beradi – uning musiqasi, hunarmandchiligi, taomlari va an’analari orqali. Kundalik hayotning tirik tafsilotlari orqali bu yerda haqiqiy ishtirok tuyg‘usi paydo bo‘ladi.
Bu yerda sayohat san’atga aylanadi – yerning nafasini his etish, uning ritmini eshitish va Markaziy Osiyoni ilgari hech kim ko‘rmagan tarzda kashf etish imkoniga ega bo‘lasiz.
Markaziy Osiyo bo‘ylab yagona sayohat qo‘llanmasi
Travel + Leisure Central Asia Qozog‘iston, Qirg‘iziston, Tojikiston, Turkmaniston va O‘zbekistonni yagona sayyohlik makoniga birlashtiradi. Bu shunchaki jurnal emas – bu yangi avlod sayohat qo‘llanmasi bo‘lib, sayohatchilarga mintaqaning yo‘nalishlari, madaniy tadbirlari, mehmonxonalari, restoranlari va tabiiy manzillarida osongina yo‘l topishga yordam beradi.
Nashr sahifalarida eng yaxshi manzillar, ishonchli marshrutlar va ilhom baxsh etuvchi kashfiyotlar haqida sinchkovlik bilan tanlangan ma’lumotlar jamlangan.
Har bir son – bu sayohat uchun xarita: zamonaviy Astanadan qadimiy Buxorogacha, Qirg‘izistonning tog‘ vodiylaridan Qoraqum cho‘llarigacha.
Ilhom manbai bo‘ladigan joy
Travel + Leisure Central Asia jamoasi turizmning barcha jabhalarini – dizayn va gastronomiyadan tortib arxitektura, texnologiya va san’atgacha – yoritishga intiladi.
Biz qalb bilan ishlaydigan hunarmandlar, mahalliy mahsulotlardan gastronomik kashfiyotlar yaratayotgan oshpazlar, merosni zamonaviylik bilan uyg‘unlashtirayotgan rassom va me’morlar haqida hikoya qilamiz.
Har bir hikoya – bu taklif: mintaqaning ritmini his etish, uning asl mohiyatini ochish va, ehtimol, o‘zingiz uchun muhim bir narsani topish imkonidir.
Biznes va mintaqaviy rivojlanish uchun yangi platforma
Travel + Leisure Central Asia nafaqat sayohatchilar uchun ilhom manbai, balki turizm va reklama sohasi vakillari uchun kuchli targ‘ibot vositasi hamdir.
Jurnalning bosma va raqamli nashrlari keng xalqaro auditoriyani qamrab oladi – yo‘nalishlarni tanlaydigan, turizmga sarmoya kiritadigan va mintaqa imidjini shakllantiradigan insonlarni.
Davlat darajasida bu jurnal muhim missiyani bajaradi – Markaziy Osiyo mamlakatlarining sayyohlik salohiyatini ilgari surish, ularning jozibali va xavfsiz yo‘nalish sifatidagi obro‘sini mustahkamlash hamda mintaqaning yagona brendini yaratish.
